मिटुनी लोचने घे भिरभिरती
सूर नांदीचे बघ दरवळती
लालचुटुक मखमाली आता
अलगद ही उमलेल
भारुनिया अवकाशच अवघा
खेळ नवा रंगेल..

नवीन नांदी संहिता नवी
हवीहवीशी भूमिका नवी
पात्र होवूनी विरघळताना
गात्र गात्र बहरेल.
भारुनिया अवकाशच अवघा
खेळ नवा रंगेल..

प्रवेश सरला अंक बदलला
अंधारातच मंच मिळाला
पुन्हा तुझ्यास्तव याच तमातून
नवा मंच उजळेल
भारुनिया अवकाशच अवघा
खेळ नवा रंगेल..
-गुरु ठाकुर