चमत्कार – तुझं तुला कळू आलं

अंधाराला उजेडाचं सापडूदे दार रे
तुझं तुला कळू आलं तोच चमत्कार रे

ज्याला त्याला उमगते
ज्याची त्याची भाषा
बाकी इथे जगण्याचा
रोजचा तमाशा
टिचभर निराशेचा सोसवेना भार रे
गाव तोच मुक्कामाचा परी वाटा चार रे
उमगावं ज्याला त्याला जगण्याचं सार रे
तुझं तुला कळू आलं तोच चमत्कार रे

जशी ज्याची जाण आहे
तसा देव त्याचा
जोतो ईथे सावरुन
तोल जगण्याचा
बडवितो दिनरात नशिबाचं दार रे
मिळेलत्या आकारात शोधतो आधार रे
उमगावं ज्याला त्याला जगण्याचं सार रे
तुझं तुला कळू आलं तोच चमत्कार रे

अंधाराला उजेडाचं सापडूदे दार रे
उमगावं ज्याला त्याला जगण्याचं सार रे
तुझं तुला कळू आलं तोच चमत्कार रे